សម្លកកូរ គឺជាសម្លប្រពៃណីខ្មែរ ដែលមានក្លិនឈ្ងុយ និងរសជាតិសម្បូរបែប ព្រមទាំងមានជីវជាតិ។ វាត្រូវបានធ្វើឡើងដោយផ្សំ ត្រី សាច់ និងបន្លែស្រស់ជាច្រើនប្រភេទ ហើយចម្អិនរួមគ្នា ដើម្បីឱ្យរសជាតិ និងក្លិនរបស់គ្រឿងផ្សំចូលជាតិគ្នាបានល្អ។ បន្លែដែលប្រើប្រាស់អាចកែសម្រួលតាមចំណូលចិត្ត និងតាមគ្រឿងផ្សំដែលមាននៅក្នុងតំបន់ ឬតាមរដូវកាល។ តាមប្រពៃណី បន្លែជាច្រើនដែលប្រើក្នុងសម្លកកូរ គឺជារុក្ខជាតិ និងផលដំណាំតាមរដូវ ដែលដាំដុះនៅជុំវិញ ផ្ទះ សួនច្បារ វាលស្រែ និងចម្ការ។
គ្រឿងផ្សំសំខាន់ៗ៖ សាច់ជ្រូក ឬត្រី, ប្រហុក, គ្រឿងបុកខ្មែរ រួមមាន រំដេង ស្លឹកក្រូចសើច រមៀត និងដើមស្លឹកគ្រៃ, ល្ពៅ, ល្ហុងខ្ចី, ត្រប់, ខ្នុរខ្ចី, សណ្ដែកកួរ, ស្លឹកម្រុំ, ស្លឹកផ្ទី, ស្លឹកបាស ឬស្លឹកបន្លែតាមរដូវផ្សេងៗ, អង្ករលីងកិន, ប្រេងឆា, ទឹកត្រី, ស្ករ, ម្សៅស៊ុប, អំបិល
ជាដំបូង ដាក់ឆ្នាំងលើភ្លើងមធ្យម និងបន្ថែមប្រេងឆាបន្តិច។ នៅពេលប្រេងក្តៅ ដាក់ប្រហុកចិញ្ច្រាំចូល ហើយកូររហូតដល់មានក្លិនឈ្ងុយ។
កូរគ្រឿងផ្សំទាំងអស់ឱ្យសព្វ រួចបន្ថែមទឹកក្នុងបរិមាណសមស្របទៅតាមកម្រិតខាប់ ឬរាវដែលចង់បាន។ ភ្លក់ និងកែសម្រួលរសជាតិតាមចំណូលចិត្ត។
បន្ទាប់មក បន្ថែមគ្រឿងបុកខ្មែរ និងបន្តកូររហូតដល់គ្រឿងមានក្លិនឈ្ងុយ។ បន្ទាប់មក បន្ថែម សាច់ជ្រូកបីជាន់ ឬត្រី ចូល។ មិនគួរប្រើភ្លើងខ្លាំងពេកទេ ព្រោះអាចធ្វើឱ្យគ្រឿងផ្សំខ្លោច និងជាប់បាតឆ្នាំង។ បន្តកូរឱ្យសព្វ រហូតដល់សាច់ឆ្អិន និងដាច់ទឹកបន្តិច។
គ្របឆ្នាំង និងបង្កើនភ្លើង រហូតដល់សម្លពុះ។ នៅពេលសម្លពុះ បន្ថែម ល្ពៅ ត្រប់ ល្ហុងខ្ចី និងសណ្ដែកកួរ។ ទុកឱ្យសម្លពុះម្តងសិន មុននឹងបន្ថែមបន្លែប្រភេទស្លឹក ដើម្បីរក្សារសជាតិ និងភាពស្រស់របស់បន្លែ។
បន្ថែម ទឹកត្រី ស្ករ អំបិល និងម្សៅស៊ុប រួចកូរឱ្យសព្វ ដើម្បីឱ្យគ្រឿងទេសរលាយ និងចូលជាតិជាមួយសាច់។
ជាចុងក្រោយ បន្ថែម ស្លឹកម្រុំ ស្លឹកផ្ទី ស្លឹកបាស និងបន្លែស្លឹកផ្សេងៗតាមរដូវ។ ទុកឱ្យសម្លពុះម្តងទៀត រហូតដល់បន្លែទាំងអស់ឆ្អិនល្អ។
បន្ទាប់មក បន្ថែម អង្ករលីងបុកប្រហែល ២ ស្លាបព្រាបាយ។ មិនគួរដាក់ច្រើនពេកនៅដំណាក់កាលនេះទេ ព្រោះអង្ករលីងនឹងរីកនៅពេលសម្លឆ្អិន។
បិទភ្លើង និងទទួលទានសម្លកកូរក្តៅៗជាមួយនឹងបាយស។
